Kapiteni i Liverpoolit, Jordan Henderson, është shpërblyer me çmimin Futbollisti i Vitit nga Shoqata e Gazetarëve të Futbollit (FËA) për paraqitjet e tij në fushën e lojës dhe veprat e tij jashtë saj gjatë sezonit 2019/20 .

Mesfushori anglez luajti rol të rëndësishëm në skuadrën e
Liverpoolit që e fitoi këtë sezon titullin e Premierligës, për herë të parë në
30 vjet, transmeton Gazeta Express.

Për ta fituar çmimin e Futbollistit të Vitit, Henderson i
mposhti rivalët si mesfushorin e Manchester Cityt, Kevin de Bruynen, dhe
sulmuesin e Manchester Unitedit, Marcus Rashfordin, si dhe disa bashkëlojtarë të
tij në Liverpool.

Ky çmim, që është çmimi më i vjetër individual në futbollin
anglez, i jepet një lojtari që ka pasur ndikim të madh në paraqitjet e klubit
gjatë atij sezoni, si dhe ka performuar individualisht mirë gjatë sezonit.

Hendersoni mori vota edhe shkaku i punës së tij bamirëse. Ai
e nisi fushatën #lojtarëtsëbashku në kulmin e krizës së koronavirusit, për t’i
shpërndarë paratë aty ku ka më së shumti nevojë.

Henderson ishte njëri ndër pesë lojtarët e Liverpoolit që u
votuan, ndërsa edhe Alisson, Virgil van Dijk, Trent Alexander-Arnold dhe Sadio
Mane u votuan nga disa gazetarë.

De Bruyne ishte futbollisti i dytë më i votuar, ndërsa
Rashfordi i Manchester Unitedit ishte i treti. Top pesëshen e kompletuan
Alisson dhe Van Dijk.

Nga një votë e morën edhe Raheem Sterling, Aaron Wan-Bissaka,
Sergio Aguero, Adama Traore, Danny Ings, Jack Grealish, James Maddison dhe
Jonny Evans. /Gazeta Express/